Sudaqta Rusiye mahsus hızmetleri rayon meclisiniñ reisi İlver Ametovnıñ evinde tintüv keçirdiler. Bu aqta o Qırım.Aqiqatqa bildirdi.
«Özüm yanıqlarnen hastahanede yatam. Telefon ettiler, tintüv ile kelgenlerini bildirdiler. Saba saat yedilerde edi ve şimdi, ğaliba, bitirgenler», – dey o.
Tintüv tafsilâtlarını Ametov şimdilik bilmey, amma kelgenler ziyaret maqsadını bildirmediler.
«Rayon Meclisiniñ reisi olam, işimden memnün degiller, ğaliba», – dep şaqa etti o.
Ametovnıñ sözlerine köre, qadınlar ve dört ufaq balası olğan evine tintüv vaqtında bir kimseni kirsetmediler. «İnsanlar evniñ yanında toplandı, turıp bekley ediler, kimseni kirsetmediler. Ne qıdırğanlarını bilmeyim», – dey Sudaq rayon meclisiniñ başı.
İlver Ametov evinde gaz qazannıñ patlavı neticesinde olğan yanıqları ile hastahenede yata. Patlav yarımada yarıqsız qalğanından soñ yüz berdi.
Qırım uquq qoruyıcı organlarınıñ tintüv aqqında izaatları daa yoq.
Noyabr 30 künü Qırımda İçki rayon regional meclisiniñ reisi Rustem Mennanov, İslâm-Terek regional meclisiniñ reisi Ekrem Abdulvatovnıñ evlerinde tintüv keçirildi.
Qırımtatar Milliy Meclisi reisiniñ muavini Nariman Celâl Abdulvatovnıñ evinde tintüv Herson vilâyetinde elektrik tiremeleriniñ patlavı ile bağlı olğanını qayd eti.
Bu aqta da Qırım uquq qoruyıcı organları bir şey aytmay.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
