Link açıqlığı

Qırım rus ükümetiniñ başı Sergey Aksenov emindir, Ukraina yolbaşçılığı, şu cümleden, prezident Petro Poroşenko deñişse, «Kiyev ve Qırım munasebetleri eyileşir».

Bu aqta o Facebookta yazdı ve qıtaiy Ukrainadan yarımadağa elektrikniñ berilmemesi «qırımlılarnı birleştirgenini» qayd etti.

«Başta bu kibi erbaplar Qırım ile demir yol, soñra avtobus, avtomobil alâqasını yasaq ettiler, endi saçmalıqbaşlandı. Böyle şaraitlerde Qırımda elektrik energiyasınıñ söndürilmesinden kimse ayrette qalmadı, qırımlılar maneviy ceetten buña azır edi. Şimdi Ukraina elektrik energiyasını berse bile, vatandaşlarımız böyle ediyeden vazgeçmege çağıracaqlar», – dep tüşüne Aksenov.

«Kiyevde şimdi olğan saçma bir ükümet ile siyasiy munasebetlerni qurmağa imkân yoq. Eminim, Ukrainanıñ şimdiki prezidenti deñişse, munasebtelrimiz kene eyileşir», – dep qoştı o.

Ukrain akimiyetiniñ Qırım yolbaşçılığınıñ böyle bildirüvine izaatı daa yoq.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG