Qırım qamaçavınıñ faalleri tarafından ilân etilgen nevbetteki adımlar yarımada sakinleri içün zararlı ola bile, amma olduqça semerelri, dep tüşüne Anton Krut. O emindir, Qırım vaziyeti ileride tek fenalaşacaqtır.
Bu aqta o Qırım.Aqiqat Radiosınıñ efirinde bildirdi.
«Qırımtatar halqı tarafından qamaçav tedbirleriniñ arttırılmasını beklemek kerek. Bu vaziyet tek kerginleşecek. Hatırlatam, bazarertesi künü Türkiye niayet Qırım ile parom alâqasını toqtattı, bu ise Qırımğa erzaq artıq ketirilmese, Rusiye akimiyetini işandırğan yolçuqlardan biri edi», – dedi o.
Siyasetşınas emindir ki, Ukraina ve qamaçav faallerinde «Keriç parom keçitiniñ işine tesir etmek içün mehanizmleri bar».
«Halqara uquq boyunca Qırım alâ daa Ukrainanıñ qısmı ola, Keriç boğazı ise Rusiye ve Ukrainanıñ qullanuvında buluna. Yani, Ukraina alâ daa işbu regionda gemilerniñ areketini nezaret ete bile. Ukrain gemisiniñ nasıldır bir bozuluvı ola bilecegini red etmeyim, eñ kelişmegen yerde ve eñ kelişmegen saatte», – dedi Krut.
Qırım qamaçavı boyunca vatandaşlıq aktsiyasınıñ idarecisi Lenur İslâmov aytqanı kibi, Qırımğa mal, erzaq ve elektrikniñ ketirilmesi toqtatılğanından soñ, yarımadanıñ «deñiz qamaçavı» başlanır, şu cümleden Qırımnı Rusiye Federatsiyasınıñ Krasnodar diyarı ile bağlağan yekâne naqliyat arterriyası olğan Keriç keçitiniñ qamaçavı da.
Qırım rus ükümetiniñ birinci baş nazir muavini Mihail Şeremet Qırım qamaçavı teşkilâtçılarını yarımadanıñ «deñiz qamaçavı» aqta planlarnı qurmamaq çağırdı. Qırım Nazirler şurasında eminler, faallerniñ bu kibi ıntıluvı olsa, Rusiye sıñırcıları «ateş açarlar».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
