Halqara teşkilâtlarnıñ temsilcileri Rusiye Federatsiyasınıñ akimiyetine muracaat emtegence, siyasiy mabüsler serbest bıraqılmaz. Bu fikirni Qırım.Aqiqat Radiosınıñ aqşam efirinde «Ukrainskaya pravda» neşiriniñ baş muarriri Sevgil Musayeva-Borovik bildirdi.
Onıñ sözlerine köre, Qırımnıñ iqtisadiy, erzaq ve energetik qamaçavından siyasiy mabüslerni azat etmezler.
«Halqara şerik, nasıldır bir teşkilâtlar tarafından bu aqta rica olmasa, Rusiye cemaat tesiri, qamaçav tesiri altında alıp er kesni azat etecegini tüşünmeyim», – dey Musayeva-Borovik.
Amma vatandaşlıq aktsiyası bu meselege halqara nezaretçi ve teşkilâtlarnıñ diqqatını celp eter, dep tüşüne Musayeva-Borovik.
«Bu areketlerge halqara teşkilâtlar, halqara yetekçilerniñ cevabı olur dep ümüt etem, şu cümleden Qırımda elektrik energiyasınıñ söndürilmesine de. Adetiy bir şey degildir. Bir afta evelsi Brükselde edik, bunı anda da muzakere eteler… Diplomatlar bu vaziyet aqqında bile, soraylar ve bunıñ ne sebepten olğanını añlaylar», – dey jurnalist.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Rusiye akimiyeti qırımlı Oleg Sentsov ve Aleksandr Kolçenkonı Rusiyede yasaqlanğan «Pravıy setkor»nıñ teşkil etüvinde, «Qırım Rusiye cemiyeti» ve Aqmescitte «Yedinaya Rossiya» firqasınıñ ofislerini ateşke berüvde ve Lenin abidesiniñ patlavını azırlavında qabaatlay. Sentsov ve Kolçenko 20 ve 10 yıllıq apis cezasına maküm etilgen, ekisi de qaabatlarnı red ete. Bu iş boyunca Rusiye mahsus hızmetleri tarafından Gennadiy Afanasyev ve Aleksey Çirniy de Rusiyede yaqalanğan.
Bunıñ ile Nadejda Savçenko, Nikolay Karpük, Stanislav Klih, Sergey Litvinov, Valentin Vıgivskiy ve Yuriy Soloşenko siyasiy mabüsler olaraq tanıla.
Qırımda «fevral 26 işi» boyunca Meclis reisiniñ muavini Ahtem Çiygoz, dört çağına yetmegen balanıñ babası Ali Asanov ve Mustafa Degermenci yaqalanğanlar.
