Link açıqlığı

Qırımnıñ rus ükümetiniñ başı Sergey Aksenov qırımlılarnı dizel-generatorlarnıñ gürültisine alışmağa çağıra.

Böyleliknen o dekabr 1 künü fevqulâde vaziyetler aqibetleriniñ yoq etilmesi boyunca ştabnıñ toplaşuvında Rospotrebnadzor Qırım bölüginiñ reberi Natalya Penkovskayanıñ malümatına cevap berdi.

Penkovskayanıñ aytqanı kibi, bölüginde şikâyetlerniñ miqdarı sıq ola ve Aksenovnıñ qırımlılarnı biraz çıdamağa çağırmasını rica etti.

«Rospotrebnadzor dizel-generatorları olğanlarğa nisbeten bir şey yapmayacaq», – dedi Aksenov.

Qırımnıñ rus baş naziri qırımlılardan oñaytsızlıq içün afu soradı ve gürültige «muayyen müddet devamında» çıdamağa kerek olğanını qayd etti – qısqa müddet devamında, degeni kibi.

Şu vaqıtta Qırım parlamentiniñ başı Vladimir Konstantinov aytqanına köre, Ulu Vatan cenki zamanında «şeerelrniñ azat etilmesi vaqtında tank dizelleriniñ gürültisi eñ hoş edi», şimdi de qırımlılar içün dizel-generatorlarnıñ sesi hususiy omlalı. «Onı oyunlarda ara-sıra qoyacaqmız», – şaqa etti Konstantinov.

«Devlet şurasında birinci (oyunlar – QA) olacaqmı?» – soradı Aksenov.

«… dizel-quvetlerniñ muzıkası ile», – devam etti Qırım spikeri.

Bundan soñ Konstantinov Qırım memuriyetiniñ başlarını ve yerli deputatlarnı fevqulâde vaziyet ziyanını saymağa çağırdı. Fikrine köre, milliardlarnen ruble aqqında söz kete.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG