Link açıqlığı

Qırım rus ükümetiniñ birinci baş nazir muavini Mihail Şeremet Qırım qamaçavı teşkilâtçılarını yarımadanıñ «deñiz qamaçavı» aqta planlarnı qurmamaq çağırdı. Qırım Nazirler şurasında eminler, faallerniñ bu kibi ıntıluvı olsa, Rusiye sıñırcıları «ateş açarlar».

Şeremetniñ sözlerine binayen, Qırımnıñ bütün strategik obyektleri, şu cümleden Keriç parom keçiti qoruv altındadır. «Biz er şeyni nezaret ete ve qoruymız, şunıñ içün fırsatları yoq», – dedi «RİA Novosti» neşirine Şeremet.

Qırım ükümetiniñ diger baş nazir muavini Ruslan Balbek dey ki, Qırımnıñ «deñiz qamaçavı» Rusiye gemileriniñ rastkelişi ile biter.

«Deñiz qamaçavı Rusiye Federatsiyasınıñ sıñır gemilerine birinci rastkelişten soñ biter», – dey Balbek. Sözlerine köre, «Rusiye sıñırcıları qanun bozğanlarnen laf etmey ve kerek olğanda birden ateş açarlar»

Qırım qamaçavı boyunca vatandaşlıq aktsiyasınıñ idarecisi Lenur İslâmov aytqanı kibi, Qırımğa mal, erzaq ve elektrikniñ ketirilmesi toqtatılğanından soñ, yarımadanıñ «deñiz qamaçavı» başlanır, şu cümleden Qırımnı Rusiye Federatsiyasınıñ Krasnodar diyarı ile bağlağan yekâne naqliyat arterriyası olğan Keriç keçitiniñ qamaçavı da.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG