Qırımda müşterilerniñ elektrik teminlevi yarımadada eñ azından eki elektrik stantsiyasınıñ qurucılığına qadar stabil olamaz. Bu aqta dekabr 1 künü fevqulâde vaziyetler aqibetleriniñ yoq etilmesi boyunca ştabnıñ toplaşuvında Qırım rus ükümetiniñ başı Sergey Aksenov bildirdi.
«Qırım territoriyasında eki elektrik stantsiyası qurulmağancе, muayyen kergin vaziyet saqlanılacaq, amma eminim, qıtadan elektrik energiyasınıñ berilmesi ealiniñ ihtiyacını yerine ketire bilir», – dedi o.
Söz Aqmescit ve Aqyarda eki elektrik stantsiyasınıñ qurucılığı aqqında kete, 2018 senesi çalışıp başlamaq kerekler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
