Rusiye baş naziri Dmitriy Medvedev aytqanı kibi, yaqın zamanda Qırımnıñ energetik qamaçavı ile bağlı mesele al etilecek. Bunı оMoskvada vatandaşlarnıñ qabul etüvi vaqtında bildirdi, dep haber ete Qırımnıñ rusiyeli ükümetiniñ «ruporı» «Krıminform».
«Yaqın vaqıtta Qırımdaki ışıq meselesini çezermiz. Oña artıq qaytmaycaqmız. Birazdan er şeyni tamamınen al etermiz», – dey Medvedev.
Bunıñ ile Medvedev bala bağçalarında yarıqnıñ olmağanına şikâyet etken qadınğa cevap berip, «Rusiye territoriyasında olğanı kibi, Qırım da bala bağçaları ile teminlenir».
«Biz Qırım boyunca bala bağçaları ile meseleni memlekette yapqanımız kibi al etermiz», – söz berdi o.
«Federal strukturalarğa, cumhuriyet yolbaşçısına mahsus avale eterim, köyüñiz ve yanında mektepniñ qurucılığına başlasınlar, aytqanıñız er üç köyde bu meseleni çezermiz», – dey o.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
