Qırım energetik qamaçavınıñ aqibetleri içün halqara qanuniyetke köre mesuliyetni «işğalci-memleket Rusiye degil de, Ukraina çekecek». Bunı Qırım.Aqiqatqa Qırım uquq qoruyıcı gruppasınıñ idarecisi Vissarion Aseyev bildirdi.
Onıñ sözlerine köre, qırımlılar içün Rusiye mesuliyetli olğanına baqmadan, yarımadanıñ energetik qamaçavından mesuliyet ukrain devletine keçecek, çünki o yarımadanı elektriksiz qaldırğan meseleni iç te çezmege tırışmay.
«Ukrain akimiyeti, birinciden, yapılğan cinayetni taqiq etmey – Herson vilâyetinde strategik inşaatlarnıñ bozuluvı. Eñ azından, cemaat bu taqiqat aqqında bir şey bilmey. Ekinciden – elektrik energiyasınıñ ğayrıdan berilmesine imkân yaratmay. Qırımlılardan bazıları İnsan aqları boyunca Avropa mahkemesine muracaat etse, mesuliyet episi bir Ukrainağa qalacaq», – dey Aseyev.
Uquq qoruyıcınıñ fikrine köre, elektrik energiyasınıñ olmaması qırımlılarnıñ ayatına telükelidir. «Qırım sakinleri bu aqta halqara davalarnı azırlağanı aqqında malümat şimdi yoq. Ve biz, çoq şükür, yarımadada olğan fevqulâde vaziyetniñ qurbanları aqqında bir şey eşitmedik. Amma elektrik energiyasınıñ olmamasından bir kimsenen bir şey olsa, Ukraina mesuliyetli olacaq, şübesiz. Bundan da ğayrı, Rusiye işğalci-memleket olaraq mesuliyet çekecekmi, emin degilim», – dey o.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
