Link açıqlığı

Saatnıñ esas haberi

Aqmescit akimiyeti 16 qazannıñ işlettirilmesi aqqında bildire


Aqmescitte Qırımğa qıtaiy Ukrainadan elektrikniñ berilmesi toqtatılğanından soñ 16 qazan dairesini işlettiler, daa bir 6 obyekt yaqında işlettirilecektir, dedi Aqmescitte «Krımteplokommunenergo» baş müendisi Vâçeslav Lopatkin şeer memuriyetiniñ toplaşuvında.

Onıñ sözlerine köre, Aqmescit RES ile qazanlarnıñ işlettirilmesi boyunca shema işlep çıqarılğan.

«Krımteplokommunenergo»da bildirilgeni kibi, mesken fondnıñ 75% qızdırılaсaq.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

XS
SM
MD
LG