«Tış işler maydanı» fondunda bildirilgeni kibi, Qırımnıñ «vatandaşlıq qamaçavı» inşaat, gemilerniñ bozuluvı sayesinde yapıla bile.
Bu aqta Qırım.Aqiqatqa fondnıñ eksperti Yuriy Smelânskiy Qırım qamaçavı iştirakçileriniñ Keriç keçitiniñ işini toqtatmaq planları aqqında bildirüvlerini izaatlap ayttı.
«İşğal etilgen territoriya ve işğalci-memeleketniñ qıtaiy qısmı arasında alâqanı tek diversiyalarnıñ vastası ile bölmek mümkün», – dedi Smelânskiy.
«Boğaznıñ eki noqtası arasında areket etken gemilerge qarşı diversiyalarnıñ etilmesi mümkün», – dep qoştı o.
Ekspert şunı da qoştı ki, «qamaçav iştirakçileriniñ işğal etilgen territoriyağa irişimi ve anda nasıldır bir areketleriniñ etilmesi boyunca imkânlarına qıymet kesemez».
Qırım qamaçavı boyunca vatandaşlıq aktsiyasınıñ idarecisi Lenur İslâmov aytqanı kibi, Qırımğa mal, erzaq ve elektrikniñ ketirilmesi toqtatılğanından soñ, yarımadanıñ «deñiz qamaçavı» başlanır, şu cümleden Qırımnı Rusiye Federatsiyasınıñ Krasnodar diyarı ile bağlağan yekâne naqliyat arterriyası olğan Keriç keçitiniñ qamaçavı da
Qırımda İslâmovnıñ aytqanını daa izaatlamadılar.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
