Qırımnıñ rusiyeli başı Sergey Aksenov yarımada ükümeti tarafından Türkiyege qarşı kirsetilecek cezalar aqqında bildirdi.
«Türkiye vatandaşları Qırım territoriyasında çalışmaycaq, bütün yatırım añlaşmaları bozulır, Türkiye mahsulatınıñ Qırım Cumhuriyetine ketirilmesi yasaqlanır. Bunıñ ile şunı qayd eteyim ki, Qırımğa ketirilgen Türkiye mahsulatınıñ miqdarı büyük degil edi ve region inkişafına tesiri büyük olmaz. Eminim, Türkiye sakinleri memleket yolbaşçısınıñ areketlerine qıymet keser, iç şübem yoq ki, qıymeti – «satqın» olacaqtır», – yazdı Aksenov Facebookta.
Aqmescite merkezinde noyabr 27 künü Türkiniñ Rusiyege qarşı siyasetine narazılığını bildirgen «Sırtqa darbe» aktsiyasınıñ iştirakçileri Türkiye prezidentiniñ süreti ile qorquqlıqnı ateşke berdiler.
Rusiye prezidenti Vladimir Putin noyabr 28 künü Türkiye Cumhuriyetine qarşı sanktsiyalarnı kirsetecek fermannı imzaladı. Bunıñ ile yanvar 1-den Rusiye ve Türkiye arasında vizasız rejim lâğu etile, Rusiye Federatsiyası vatandaşlarına ise Türkiye Cumhuriyetiniñ ziyaretinden vazgeçmege tevsiye etilgen.
Moskva ve Ankara arasında munasebet Rusiyeniñ Suriye cenkine qarışmasından soñ bozulmağa başladı. Noyabr 24 künü Rusiye arbiy uçağı Türkiye ava boşluğına kirgeni vaqtında urıp tüşürilgeninden soñ işbu munasebetler daa da kergin oldı.
