Qırımnıñ rusiyeli prokurorı Natalya Poklonskaya Qırım energetik qamaçavınıñ teşkilâtçılarını cinaiy ceza ve mülkiyet musaderesi ile qorquza.
«Cumhuriyetiimizge büyük zarar ketirgen Qırım «energetik qamaçavı»nıñ teşkilâtçıları tezden cezasını körecek», – dep yazdı o Facebookta.
Onıñ sözlerine köre, başta bir «Qırım sakinlerine nisbeten cinaiy areketlerniñ etilmesine bağlı ve qabaatlı olğan» şahıslar boyunca deliller toplanacaq.
«Soñra olarğa qabaat seslendirmek içün malümat toplanacaq, soñ olarnı qıdıruvğa ilân etecekmiz ve Rusiye Federatsiyası territoriyasında olğan mülkiyeti musadere etilecek – cumhuriyetimiz içün büyük ziyannıñ tazminatı maqsadı ile, em de olarnı mahkemege teslim etecekler», – dey Poklonskaya.
Qayd etkeni kibi, Qırımda Rusiye FSB idaresi 20 yıllıq apis cezasını nazarda tutqan cinaiy işni endi açqandır.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
