Link açıqlığı

Qırımnıñ Yuqarı mahkemesi Aqmescit Kiyev rayon mahkemesiniñ «fevral 26 işi» iştirakçileri Mustafa Degermenci ve Ali Asanovnı apiste 2016 senesi fevral 19-na qadar qaldırmaq qararını lâğu etmedi. Bunı Qırım.Aqiqat mühbiri bildire.

Mahkeme imaye şefaatını yarım saat bile baqmadı. Adliyeciler imayeleri altında olğanlarnı ya ev tevqifine keçirmege, ya da pey berüv ile azat etmege rica etkenler.

Bazarertesi künü Meclis reisiniñ muavini Ahtem Çiygoznıñ işi boyunca da mahkeme toplaşuvı olacaqtır.

Aqmescit mahkemesi endi bir qaç kere bu üç adamğa tevqif müddetini uzatqan edi. «Fevral 26»

iştirakçileriniñ adliyecileri birinci basamaq mahkemelerniñ qararlarınа şikâyet arizalarını bergen edi ve tek bir kere Qırımnıñ Yuqarı mahkemesi Çiygoz adliyecisiniñ ricasını qısmen qabul etip, onı noyabr 19-na qadar degil de, avgust 19-na qadar apiste qaldırdı. Amma birazdan Aqmescitniñ birinci basamaq mahekemesi onıñ tevqif müddetini kene de başta noyabr 19-na, soñra 2016 senesi yanvar 29-na qadar uzattı.

Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütlevi tertipsizliklerde» iştirak etüvleri içün qabaatlana.

XS
SM
MD
LG