Link açıqlığı

«Ukrenergo» hadimleri 220 kV «Kahovka –Titan» yolağınıñ tamirini bitirdiler. Amma, devlet şirketiniñ matbuat hızmeti bildirgeni kibi, Qırım qamaçavınıñ talabına binayen, yolaqtaki tellerni bir-birinden ayırdılar.

«Künniñ soñuna qadar işler tam soñunace yapıldı. Aynı zamanda, narazıcılarnıñ talabı boyunca teller ayırılğan», – deyler matbuat hızmetinde.

«Ukrenergo»da yolaqnıñ işlettirilmesi aqqında siyasiy qararnı bekleyler.

«Yolaqnıñ işlettirilmesi ve «Titan»ğa kerginlikniñ berilmesi aqqında qarar alınsa, tellerni bir qaç saatte birleştirirler», – denile beyanatta.

Yaqında «Ukrenergo» başı vazifelerini eda etken Vsevolod Kovalçuk qamaçav iştirakçileri ile elektrik tiremeleriniñ tamiri aqqında añlaşma qabul etilgenini bildirdi. Qamaçav aktsiyasınıñ idarecisi Lenur İslâmov Qırım.Aqiqatqa bildirgeni kibi, elektrik yolağınıñ işlettirilmesi aqqında laf yürsetilmey.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG