Qırımda saba noyabr 30 künü regional Meclislerniñ yolbaşçılarında tintüv keçirile, bu aqta Facebookta Qırımtatar halqınıñ aq-uquqlarını qorçalav komitetiniñ idarecisi, Qırımtatar Milliy Meclisiniñ azası Eskender Bariyev bildirdi.
«Al-azırda FSB İçki rayonı regional Meclisiniñ reisi Rustem Mennanov, İslâm-Terek rayonı regional Meclisiniñ reisi Ekrem Abdulvatovnıñ evlerinde tintüv keçire», – yaza Bariyev.
Malümatnı Qırımtatar Milliy Meclisi reisiniñ birinci muavini Nariman Celâl da tasdiqladı ve Ekrem Abdulvatovnıñ evinde tintüv Herson vilâyetinden elektrik tiremeleriniñ patlavı ile bağlı olğanını qayd etti.
«Tintüv Herson vilâyetinde elektrik tiremeleriniñ patlavı boyunca açılğan cinaiy işke bağlı olğanını bildirdiler. Eki saatlik tintüv neticesinde bir şey tapılmadı. Ekrem ağa bu tesadüfiy ziyaretten 90 yaşında babası özüni yaramay duyacağından qasevet çeke», – qayd etti Facebookta Celâl.
Qırımnıñ uquq qoruyıcı organlarından bu aqta resmiy beyanat yoq.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
