Link açıqlığı

Qırımnıñ «vatandaşlıq qamaçavı» faalleri aytqanı kibi, Qırımğa tek küçük-kilovattlı turmuş generatorlarnı ve çıraqlarnı sıñırlı miqdarda ketirmege ruhset eteler. Bunı qamaçav iştirakçisi Leonid Şipkoğa esaslanıp, UNN bildire.

«Olarnı ketirgenlerini köremiz. Birinci nevbette – bunda para qazanğan insanlar. Olarnı endi bilemiz. Evel bu insanlar başqa şeylerni alıp ketire edi, şimdi bundan qazanacaq olalar, çünki generatorlarnıñ fiyatı, qırımlılarnıñ sözlerine köre, üç qat paalılaştı. Birer generator ketirilse de – ğayet yahşı alış-veriş ola», – dey Şipko.

Sözlerine köre, qamaçav iştirakçileri çıraq ve generatorlarnı ketirgen aydavcılar aqqında malümat ve maşina nomerasını yazıp alalar.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG