Qırımnıñ rusiyeli başı Sergey Aksenov Ukraina Yuqarı radasınıñ deputatı Mustafa Cemilevni mukâfatlandırmağa istegeni aqqında bildirdi. Bu aqta o fevqulâde vaziyet aqibetleriniñ yoq etüvi boyunca ştabnıñ toplaşuvında bildirdi, haber ete TASS.
«Cemilevni Devlet şurasında körmege ve mukâfatlandırmağa isteymiz. Amma davetnameni qayda yollamağa, bilmeymiz. Prokuraturadan yollarmız, Natalya Vladimirovna (Poklonskaya, Qırımnıñ rusiyeli prokurorı – muar.) oña bulunuv yeri boyunca yollar», – dedi Aksenov.
Evel aynı şu toplaşuvda Cemilevge minnetdarlıqnı bildirmek ricası ile Aksenovğa Qurman rayonı memuriyetiniñ başı Vladimir Ganaga muracaat etti. «Bizge belâ ketirecek edi, amma halqımıznı birleştirdi. Zayıf yerlerimizni tapıp, qoyulğan vazifelerge mesuliyet ile yanaşmağa ögretti», – dedi o.
Qırımnıñ rusiyeli devlet şurasınıñ spikeri Vladimir Konstantinov, öz nevbetinde, Qırımğa elektrik energiyasınıñ berilmemesi içün Cemilev degil de, Ukraina prezidenti Petro Poroşenko mesuliyetli olğanını ayttı. «Oña (Cemilevge – muar.) öyle büyük emiyet bermeñiz, büyük oyunda piyadedir. Poroşenko belâlarımıznıñ birinci sebepçisidir», – dedi o.
Bildirilgeni kibi, Rusiye sıñırcıları Qırımğa 2014 senesi aprel 22-de Mustafa Cemilevge kirişni beş yılğa yasaq ettiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
