Link açıqlığı

Saatnıñ esas haberi

Qırımda generatorlarnı satqan iş adamları millionlarnen ruble qazana


Işıqsız qalğan Qırımda generatorlarnı satqan yerli iş adamları keçken afta devamında millionlarnen ruble qazandı. Bu aqta olar özleri aytalar.

«Eki kün içinde generatorlarnı bir buçuq millionğa sattım», – dedi Keriç iş adamlarından biri.

Benzin generatorlarınıñ fiyatları 22-30 ruble etrafındadır, quvetine köre. Satıcılarnıñ sözlerine köre, yarımadağa ketirilgen tehnika Rusiyede yapıla. Em de generator fiyatları köterilgen. İş adamları dey: kâr olacağını duyğan Rusiye satıcıları fiyatlarnı evelden kötergenler.

Generatorlarnı qoyğan tükânlar olarnı gece söndüreler. Bunı bilip, müşteriler tez bozulğan mahsulatnı almay, em de ufaq tükânlar aqşam saat beşte qapatıla, erzaq malları ise sabağace işlemegen buzdolaplarda qala.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG