Link açıqlığı

Keriçte bazarertesi noyabr 30-dan mektep ve bala bağçaları çalışmağa başlaycaq. Keriç şeer memuriyetiniñ matbuat hızmeti bildirgeni kibi, mektep qısqartılğan iş künü rejiminde çalışacaq.

Derslerniñ 30 daqqa, teneffüsler – 5 daqqa olması beklenile. Bala bağçaları künde dört saat işleycek.

Şeer memuriyetinde qayd etilgeni kibi, Keriçke Aqmescit TETs tarafından 22 megavatt miqdarında elektrik energiyası kelmekte. Qamış-Burun TETsniñ energiyası mesken maaller içün 4 megavattqa arttırıldı.

«Mesken evlerge elektrik energiyasını berüv cedveli tizilgen, oña köre şeer mikrorayonlarına er sekiz saatte dört saatke yarıq berilecek», – denile beyanatta.

Aynı zamanda, Keriç sakinleri içtimaiy ağlarda bildirgeni kibi, şeerde noyabr 22-den soñ elektrik energiyası iç te berilmegen rayonlar bar.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG