Yarımada şirketleriniñ elektrik teminlevi ile olğan meselelerden sebep qırımlılarnı parası berilmeycek otpusklarğa yollay bileler. Bu teklifni Qırım Devlet şurasınıñ reisi Vladimir Konstantinov «Rossiya segodnâ» radiosınıñ efirinde bildirdi.
«Şirketlerden çoqusı öz başına qarar ala, er bir regionda elektrik energiyasınıñ berüv cedveline köre, keçelecek iş aftası da aynı olacaq. Ya da qısqartılğan iş künü, ya da otpusk», – dey Konstantinov.
Onıñ malümatına köre, iş cedveli aqqında qarar aqşam Qırımnıñ rusiyeli başı Sergey Aksenov ile belediye yolbaşçılarınıñ körüşüvinde alınacaq.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
