Link açıqlığı

Qırımda vatandaş havfsızlığınıñ temin etüvi ve qanuniy nizamnıñ saqlanuvı içün zaruriy tedbirler becerile, 163 emiyetli obyekt qoruv altına alındı.

Bu aqta Qırım rusiyeli ükümetiniñ saytında aytıla.

Qırımda İçki işler nazirliginiñ cemaat nizamınıñ qoruvı boyunca idare reberi Valeriy Gritsay devlet akimiyeti organlarınıñ, uquq qouryıcı organları, diplomatik temsilcilikler, havflı obyektlerniñ, yaşayış teminlev, yaqarlı-energetik obyektleriniñ qoruvı arttırılğanı aqqında bildire.

Olğan malümatqa köre, fevqulâde vaziyetniñ kirsetilmesinden soñ yarımadada qanuniy nizamnıñ qaba bozuluvı qayd etilmegen eli, denile Qırım rusiyeli ükümeti saytında.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.

Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG