StopFake levhasınıñ tesisçilerinden biri Margo Gontar dey ki, Qırım işğalinden evel yarımada sakinlerini «rus tilli ealiniñ zulumı aqqında yalan malümatqa qandırdılar».
Bu aqta o Qırım.Aqiqat Radiosınıñ saba efirinde bildirdi.
«İşimizde ilk haberlerden biri Qırımda rusiyeliler, rus tilli ealiniñ zarar körgeni aqqında edi. Birazdan rusiyeli resmiy şahıslar özleri işbu malümatnı red ettiler, öyle degil dep. Amma bu rus tilli ealiniñ qoruvı boyunca ğayeni başlamaq içün fırsat yarattı», – qayd etti Gontar.
Onıñ sözlerine köre, Qırımda teşviqat bundan bayağı evel başlandı ve «insaniyetsiz «banderovets»lerniñ obrazlarını» meydanğa ketirmege yardım etti.
Yalan malümatnen küreşke yönelgen StopFake levhası bıltır mart ayında başlandı.
Evel AQŞ Devlet departamentinde bildirilgeni kibi, Rusiye er yıl teşviqatqa 1 milliard 400 million dollarnı masraf ete.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
