Link açıqlığı

Saatnıñ esas haberi

Suvuqlardan sebep Qırım qamaçavı boyunca aktsiya iştirakçileri hastalanmağa başladı – İslâmov


Ava şaraitleriniñ bozuluvı ve ava areretiniñ tüşmesi sebebinden Qırım qamaçavı boyunca aktsiyanıñ bir çoq iştirakçisi sağlıq problemalarına rastkele, bazıları aq ciger yanğısına hastalandı. Bunı Qırım qamaçavı boyunca aktsiyanıñ liderlerinden biri Lenur İslâmovğa esaslanıp, Herson vilâyet devlet memuriyetiniñ matbuat hızmeti bildire.

Aynı vaqıtta, noyabr 26-da Lenur İslâmov bildirgeni kibi, aktsiya iştiraçikçilerinde bütün zaruriy şey bar. Sözlerine binayen, em erzaq, em ilâc, urba, qızdıruv malzemeleri de bar.

«Ebet, erzaq teminlevi ile bizge göñülliler, Herson vilâyetinde yaşağan vatandaşlar, akimiyet temsilcileri yardım ete. Şunıñ içün, yaşayış içün ne kerek olsa, bizde er şey bar», – dedi o.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» aman-aman tamirlediler.

XS
SM
MD
LG