Qırım qamaçavı teşebbüsçilerinden biri Lenur İslâmov «Ukrenergo» devlet şirketi tarafından Herson vilâyetinde bozulğan dört tiremeden biriniñ tamiri ne sebepten toqtatılğanını añlattı. Bu aqta o Qırım.Aqiqatqa añlattı.
«Tamir işlerini başlamaq ve prezident Poroşenko, baş-nazir, Mustafa Cemilevge tesir etken halqara müessiselerniñ basqı derecesini eksiltmek içün Mustafa Cemilevniñ tamir işlerini başlamaq ricasını yerine ketirdik. Amma işlettirilmesi aqqında laf bile olamaz, anda ukrainlerimiz azat etilmegence, adım attıq, tınç halqmız, ketişatlarğa yanaşmağa imkân berdik, işlettirilmesine daima azır olmağa, amma siyasiy mabüslerimiz serbest bıraqılmağance, bir şeyni yaqmaycaqmız. Ciddiy mevamımız», – dep añlattı İslâmov.
Bunıñ ile o şunı da qayd etti ki, qamaçav aktsiyasınıñ iştirakçileri – Qırım energiya ile teminlevine qarşı, amma Qırımtatar Milliy Meclisiniñ qararlarını qabul etmege azır.
«Elbette ki, Meclisniñ er bir qararını eda etecekmiz, begensek-begenmesek de, amma o taraftan da areket başlanmasını isteymiz», – dedi Qırım qamaçavınıñ teşebbüsçilerinden biri.
«Ukrenergo» devlet şirketiniñ tamir brigadası Herson vilâyetinde bozulğan dört elektrik tiremesinden biriniñ tamirini toqtattı. «Ukrenergo» haber siyaseti idaresiniñ reberi Zinoviy Butse aytqanı kibi, işler noyabr 26 künü «yarımada energetik qamaçavı iştirakçileriniñ ricası ile» toqtatıldı.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 25 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tiremesini aman-aman tamirlediler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
