Link açıqlığı

Saatnıñ esas haberi

Qırımda «Qırım» fondunıñ başı Riza Şevkiyevniñ oğlu sorğuğa çağırıldı


Qırımda «Qırım» fondu başınıñ oğlunı Rusiye uquq qoruyıcıları sorğuğa çağırdılar. Bunı Qırım.Aqiqatqa fondnıñ reberi Rza Şevkiye bildirdi.

«Tünevin aqşam Qırımda bizim qomşularımızğa emiyetli işler boyunca taqiqat idaresinden oğlum Rustem Şevkiyev adına celpnameni berdiler. Evde yoq edi. Onı saat altıda körmege istediler. Keç aqşam evge kelgende, oña сеlpnameni berdiler. Taqiqatçığa bugün telefon etmege tevsiye etim, şimdi telefon etip, ne aqta sorağanlarını tarif etecegini bekleyim», – dedi Şevkiyev.

Sorğu mevzusı belgisiz, amma Şevkiyevniñ degeni kibi, subet qıtaiy Ukraina territoriyasında Qırım qamaçavınıñ keçirilmesi ile bağlı olacaqtır.

«Qamaçav iştirakçilerine cinaiy işni açmağa vade etken Poklonskayanıñ qorquzuvları boyunca Meclis azalarını qorqutuv mehanizmidir», – dey Riza Şevkiyev.

Aynı bu iş boyunca qırımtatarlarnıñ milliy lideri Mustafa Cemilevniñ apayı Safinar çağırıldı. Oña celpname Herson vilâyetinde bozulğan tiremeler boyunca keldi.

Evel Qırımnıñ rusiyeli prokurorı Natalya Poklonskaya qıtaiy Ukraina tarafından elektrik energiyasınıñ berilmesiniñ toqtatıluvı sebebinden cinaiy işniñ açılması aqqında bildirgen edi.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG