Rusiye FSB Qırım idaresi tarafından qırımtatarlarnıñ milliy lideri Mustafa Cemilevniñ qadını Safinar sorğuğa çağırıldı. Bunı Safinar Cemileva Qırım.Aqiqatqa tarif etti.
«Celpname Herson vilâyetinde bozulğan tiremeler boyunca keldi. Telefon ettim (FSB idaresine – QA), soradım, Cemilevge qarşı iş açılğanını bildirdiler, teraktqa qol tutqanı boyunca, men ise apayı olaraq bu terakt aqqında şaatlıq köstermelim. Bu işte iştirak etmegenimni ayttım. Şimdi advokat menim soyu olaraq şaatlıq etmege razı olmağanım aqqında mektüp azırlay», – dey o.
Safinar Cemileva aytqanı kibi, sorğuğa Aqmescitte noyabr 25 künü kelmek kerek edi.
Qırımtatarlarnıñ yetekçileri, şu cümleden Mustafa Cemilev, sentâbr 20-den devam etken Qırım qamaçavınıñ teşebbüsçileri ola.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi. Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tiremesini tamirlediler.
