Ukraina Haber siyaseti naziri Yuriy Stets Ukraina içki işler naziri Arseniy Avakovğa muracaat etip, ATR telekanalınıñ jurnalisti Gülsum Halilovа, «Golos Krımu» haber agentliginiñ ve «Hersonskiye vesti» internet neşiriniñ jurnalistleri Linda Mettsger ve Aleksey Stavitskiyge ücüm etkenlerni tapmaq ve cezalamaq içün bütün zaruriy şeylerni yapmağa çağırdı. Bunı müessiseniñ matbuat hızmeti bildirdi.
«Jurnalistlerniñ faaliyetine keder etüv uquqiy demokratik devletinde mümkün degil. Matbuat vastalarınıñ temsilcilerine ücümler taqiq etilmeli, qabaatlı şahıslar cezalanmalı, jurnalistlerni urmağa mümkün degil!», – qayd etti Stets.
Nazirniñ sözlerine köre, jurnalistlerge nisbeten yapılğan işbu areketler Ukraina cinaiy kodeksiniñ 171-nci maddesine köre «Jurnalistniñ qanuniy professional faaliyetine aselet keder etüv», CK 3451 maddesiniñ 2-nci qısmı «Jurnalistke nisbeten telüke ve zulum» ve CK «Uquq qoruyıcı organlarınıñ hadimleri tarafından vekâletlerniñ artqaç qullanuvı» 365 maddesine köre baqılacaq.
Noyabr 21kunü Qırım ile memuriy sıñırda politsiya ve faaller arasında yüz bergen ziddiyet neticesinde ATR qırımtatar telekanalınıñ jurnalisti Gülsum Halilova zarar kördi. Bildirilgeni kibi, «ziddiyet vaqtında jurnalist yıqıldı, başta buña diqqat etmedi, amma 1,5 saatten soñ «acele yardım»nı çağırmağa mecbur oldı». Halilovanıñ qursağı yaralandı.
Aqşam noyabr 21 künü «Hersonskiye vesti» neşiriniñ jurnalisti Linda Metzger ve onıñ video operatorına Qırım ile memuriy sıñırda belgisiz şahıslar ücüm etti. Jurnalistler vaqia yerini terk etmege mecbur oldılar.
Noyabr 23 künü «Golos Krımu» haber agentliginiñ jurnalistleri Yelena Halimon ve zenaatdaşları Qırım ile memuriy sıñırda ücümge oğradı. «Avtomaydan Kiyev» faalleri vaqialarnı videoğa çıqarmağa yasaq ete, jurnalistlerni aqaretley edi.
