Qırımda Rusiye FSB Qırım idaresiniñ temsilcileri Qırımtatar halqınıñ aq-uquqlarını qorçalav komitetiniñ idarecisi, Meclis azası Eskender Bariyevniñ ana-babasından onıñ bulunuv yerini ögrenmege tırıştılar. Bu aqta Bariyev Facebookta yazdı.
«2015 senesi noyabr 25-de ana-babama (baba – 82 yaşında, 14 yıl devamında saqattır, üç insultnı yaşadı, laf etip olamay, ana – 77 yaşında) FSB hadimleri keldi, oğulları Bariyev Eskender Enveroviç qayda bulunğanını ögrenmege başladılar, sanki Herson vilâyetinde elektrik tiremeleriniñ patlavı sebebinden qıdıralar. Tatalarım aqqında soradılar. Olarnı sorğuğa çağırdılar», – dey o.
Bariyev şunı da qayd etti ki, o saqlanmay ve öz mevamını açıq bildire. Bunıñ ile uquq qoruyıcınıñ degeni kibi, yaqınları onıñ faaliyetine bağlı degil.
«FSB «evendileri», faaliyetiñizni taqlit etmege ve meni qıdırmağa kerekmey. Saqlanmayım. Cemaat ögündem. Mevamımnı açıq bildirem. Yaqınlarımnı tiymeñiz, faaliyetim ve vatandaşlıq mevamıma alâqaları yoqtır», – dey o.
Bariyeniñ sözelerine köre, Qırım qamaçavı boyunca aktsiyağa qol tuta, amma Herson vilâyetinde elektrik tiremeleriniñ patlavına alâqası yoq. Nevbetteki sefer şunı qayd etti ki, Qırımda rusiyeli akimiyet «halqıma ayırım ve genotsid yapmaqta», insan aqlarına boza.
Eskender Bariyev qıtaiy Ukrainağa Qırımnıñ Rusiye tarafından işğal etilgeninden soñ köçti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
