«Ukrenergo» devlet şirketiniñ Cenübiy energosistemasınıñ Herson magistral ağları brigadası «Kahovka – Titan» yolağında bozuluvlarnıñ yoq etilmesi üzerinde çalışmağa devam ete. Bunı çarşenbe künü, noyabr 25-de, «Ukrenergo» matbuat hızmeti bildirdi.
«Ava şaraitleri tünevin olğanından biraz eyice – yağmur yoq, amma, işni ve tehnikanıñ qullanuvını tünevin yağğan sağanaqlardan sılanğan topraq biraz zorlaştıra», – denile beyanatta.
Cedvelge köre, tamir işleri noyabr 26 kününe qadar soñuna yetmeli.
«Ukrenergo»da bildirilgeni kibi, tamir işlerniñ soñunda yolaqqa kerginlik «qabul etilgen nizamğa köre» berilecek.
Patlağan tiremeniñ yanında çadırda nevbette bulunğan faaller «Ukrenergo» Herson magistral ağlarınıñ tamir işlerini nezaret ete.
Qırım.Aqiqatqa faallerden biri Roman Ragozin aytqanı kibi, gece tamir işleri keçirilmedi, gece nevbeti «tınç keçti». Şimdi faaller «Kahovka – Titan» yolağı tamiriniñ soñki basamağını nezaret ete.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tiremesini tamirlediler.
