Link açıqlığı

Qırımnıñ rusiyeli başı Sergey Aksenov dey ki, yarımadadaki şimdiki vaziyet qırımlılardan «sabır ve çıdam» talap ete. Bunı o «Sulh – Allahnıñ ediyesi» şurasınıñ toplaşuvında bildirdi, haber ete Qırımnıñ rusiyeli ükümetiniñ matbuat hızmeti.

«Er şey qollarımızda, bugün esas vazifemiz – vatandaşlarımıznıñ ağır vaziyeti aqqında bütün rica ve tekliflerge vaqtında seslenmege. Bugünki körüşüvimiz devamında vatandaşlardan böyle kibi malümatnı alğan bütün din temsilcileri onı fevqulâde vaziyetler boyunca acele ştabnıñ vekillerine bildirmege kerek olğanını qararlaştırdıq. Er keske qol tutmağa tırışırmız», – dedi Aksenov.

O şuña eminligini qayd etti ki, bugün «yarımadanı ışıqsız qaldırğan terroristlerniñ qolundan» zarar körgen sakinler şimdiki qıyınlıqlarğa dayanır, «maneviy ve maliyeviy ziyanğa baqmadan».

Qırım rusiyeli Devlet şurasınıñ başı Vladimir Konstantinov Ukraina ile munasebetlerniñ tam toqtatılması aqqında ayta: «Referendum»da qırımlılar Ukrainağa nisbeten «qapaqlarnı qapatsa», endi şu qapaqlarnı «qaynaqnen bitiştirmege» vaqıt keldi. Menimce, şimdi Ukrainağa tuvğan tilde aytmağa kerek – good bye, Ukraina!». Yazdı o Facebookta.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.

Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.

XS
SM
MD
LG