İnsan aqları boyunca Qırım alan eyyetiniñ başı Andrey Yurov dey ki, Qırımda yaşayış oñaytlığı içün yerli akimiyet ve Rusiye Federatsiyasınıñ yolbaşçılığı mesuliyetli. Bu aqta o salı künü, noyabr 24-de, Qırım.Aqiqat Radiosınıñ aqşam efirinde bildirdi.
«İnsanlarnıñ şimdi özlerini Qırımda yahşı duyması içün, bütün halqara qaideler, şu cümleden insaniy aq boyunca, Rusiye Federatsiyasınıñ akimiyeti ve yerli akimiyet mesuliyetli, çünki olar bütün alemge bu topraq içün mesuliyetli olğanını ilân ettiler», – dedi Yurov.
Uquq qoruyıcı degeni kibi, «formal, halqara, insaniy aq ve insan aqları noqtaiy nazarından» ayta.
«Şunı aytam ki, yani bu topraq aktual – şimdi diger momentlerni aytmaymız, aktual ise Rusiye Federatsiyası tarafından nezaret etile. Yani, anda olğan bütün adiseler, em yahşı, em yaman adiseler içün Rusiye Federatsiyası cevap bermeli. Ve, ilk evelâ, elbette ki, regional ve yerli akimiyet», – qayd etti Yurov.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.
