«Krımenergo» şirketinde elektrik aqımsız qalğan yarımada ealisini yaqında Rusiyeden Qırımğa quvetli elektrik generatorlarnı ketirecekler dep tınçlandıralar. Bunı Qırım.Aqiqatqa Qırım energiya berici şirketiniñ kontakt-merkezinde bildirdiler.
«Bizge yardım ketireler – quvetli generatorlarnı, tezden vaziyet eyileşir»,– deyler «Krımenergo» kontakt-merkezinde.
Şimdi Aqmescitte yarıqnı er dört saat söndüreler, amma yerli sakinler degeni kibi, er yerde öyle degil. Şeerniñ bazı rayonlarında yarıqnı 8 saat bermey bileler.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi. Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.
