Link açıqlığı

Qırımnıñ elektrik teminlevi yaqın vaqıtta qısmen tiklenmeli, bunı Kiyevde salı künü, noyabr 24-de, qırımtatar halqınıñ yetekçisi Mustafa Cemilev bildirdi.

«Şimdi bozuluvlarnıñ yoq etilmesi boyunca tamir işleri keçirilmeli ve, belki de, birazdan, eki, üç ya da dört künden soñ muhtar cumhuriyetke 220 megavatt bergen yolaq çalışır, soñra ise baqacaqmız. Fikrimizge köre, elektrik energiyasınıñ berilmesi aqta añlaşma Ukraina menfaatına kelişmey ve onıñ içün ğayrıdan baqılmalı», – dey Cemilev.

Aytqanı kibi, Qırımğa elektrik energiyasınıñ berilmesi aqta añlaşma yanvarniñ 1-ne qadar süre.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi. Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.

XS
SM
MD
LG