Qırım devlet şurasınıñ reisi Vladimir Konstantinov aytqanı kibi, «elektrik ağı – Qırımnı Ukraina ile bağlağan soñ yipçiktir».
«Ukrain suvu ve ukrain mahsulatı olmadan yaşamağa ögrengenimiz kibi, ukrain elektrik ağı olmasa da, yaşap olurmız – şübesiz. Ukraina – good bye!» – yazdı o Facebookta.
«Küreşmege azırmız ve eminmiz, Rusiye bizni taşlamaz, er vaqıt yardımğa keler. Bundan yeñilmez olamız, er angi duşman areketine azırmız. Tınç ve er zaman azır olacaqmız», – denile Konstantinovnıñ beyanatında.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi. Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.
