Link açıqlığı

Qırımtatarlarnıñ milliy yetekçisi Mustafa Cemilev dey ki, yarımadada yaşağan vatandaşları olarğa qarşı umumrusiye devlet seviyesinde repressiyalarnıñ ola bileceginden saqınalar.

Bunı o Kiyevde noyabr 24 künü matbuat konferentsiyası devamında bildirdi, haber ete Qırım.Aqiqat.

«Olar (Qırımda Rusiye akimiyetiniñ temsilcileri – QA) qırımtatarlarnıñ yerli idaresi strukturasını tamamınen felçke oğratmağa tırışalar, şimdi Meclis ve Qurultaynı ekstremist, terroristik teşkilât olaraq tanıtmağa çalışalar. Bu qararnı alsalar, Qıırmtatar Milliy Meclis azalarına nisbeten kütleviy ayırımlar başlanacaq – umumen 33 Meclis azası ve yerli regional meclislerniñ daa bir 2300 azası. Buña insanlar azır», – dey Cemilev.

O şunı da qayd etti ki, şimdi Qırımda turmuş seviyede qırımtatar halqınıñ temsilcilerine itiraz körüne, sebebi – qıtaiy Ukrainada bulunğan faallerniñ energetik qamaçavı.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi. Noyabr 24 künü «Ukrenergo» bildirgeni kibi, işçiler bozulğan tiremelerniñ birini tamirlemege başlağanlar.

XS
SM
MD
LG