Qırımtatar halqınıñ aq-uquqlarını qorçalav komitetiniñ idarecisi, Meclis azası Eskender Bariyev bildirgeni kibi, noyabr 23 künü, Qırımnıñ İçki rayonı Mañ Kermen köyüniñ sakini İlyas Halilov yaqalanıldı.
«Şimdi Qırımnen bağlanmağa qıyın, amma tünevin kelgen haberge köre, genç qoylarnı otlata edi, silâlı maskalı insanlar kelip, onı alıp kettiler. Mañ Kermen köyünde edi», – dedi Qırım.Aqiqatqa Eskender Bariyev.
Al-azırda yaşnıñ faaliyeti aqqında tam malümat yoq, amma Bariyevniñ tahminlerine köre, İlyas Halilov 2014 senesi fevral 26 künü Qırım Yuqarı Radası yanında keçirilgen miting iştirakçisi ola bile edi. Bariyev onıñ yaqalanuvı rusiyeli FSB hadimleri tarafından yapılğanını tüşüne.
Qırımnıñ uquq qouryıcı organlarından bu aqta resmiy izaat şimdilik yoqtır.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
