Aqmescitniñ bazı şahsiy klinikalarında generatorlarnıñ olmağanından sebep tibbiyet adamları umumiy analizlerni qabul etmey, haber ete Qırım.Aqiqat mühbiri.
Böylece, Aqmescitniñ 60 let Oktâbrâ soqağında şahsiy hastahane bölüginde hadimlerniñ bildirgeni kibi, yolbaşçılıq analizlerni qabul etmege yasaq etti, çünki elektrik ağı daimiy sürette berilmey. Anda Ğalebe caddesinde yerleşken baş bölükke muracaat etmege tevsiye eteler.
Diger şahsiy klinikada Qırım.Aqiqatqa añlatılğanı kibi, alâ daa analizlerni qabul eteler, çünki müessiseniñ generatorları bar ve ameliyathane daima çalışa.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
