Qırım.Aqiqat haber saytı ve QHA haber agentliginiñ yolbaşçılığı saytlarda aşkâr etilgen malümatnı qullanganda bağlantını qayd etmegen türk zenaatdaşlarını müelliflik aqlarına riayet etmege çağıra.
Qırımnıñ memuriy sıñırında üküm sürgen kergin vaziyet ve qırımtatarlarnıñ meseleleri aqqında haberlerniñ miqdarı çoq olğanından sebep, bazı türk resursları Qırım.Aqiqat saytınıñ qırımtatar tilinde (latin urufatında) ve QHA agentliginiñ türk tilinde çıqqan haberlerini ilk menbağa bağlantını bermeyip, biraz tüzetip qullana.
«QHA haber agentliginiñ ve Qırım.Aqiqat haber portalınıñ qırımtatar ve türk tillerinde çıqqan haber ve analitik malümatlarınıñ sıq sürette qullanılması sebebinden Türkiye zenaatdaşlarımıznı haberlerni uyğun şekilde, yani menbanı qayd etip ve müelliflik aqlarına riayet etüv ümdelerine esaslanıp, aşkâr etmege çağıramız», – denile muracaatta.
Aks alda Qırım.Aqiqat ve QHA Türkiye Cumhuriyeti mahkemesine müelliflik aqlarına riayet etüv ile bağlı dava ile muracaat etmek aqqından faydalana bile.
