Aqmescitte soñki üç ay içinde ekinci kere «Yañı dünya» qırımtatar gazetasınıñ muarririyetini abradılar. QHA neşiri bildirgeni kibi, vaqia bazar kününe keçer gecesi yüz berdi. Hırsızlar muarririyet binasında pencere parmaqlığını pıçıp, muasebeciniñ bilgisayarı ve sсanerni çaldılar.
«Hırsızlıq vaqiasını qay etmek içün politsiyanı çağırdıq. Başqa bir şey aytamam. Amma bizni birinci sefer abrağanlar daa tapılmadı», – dedi gazeta muarriri Zera Bekirova.
Avgust ayında belgisiz şahıslar gazeta yapılğan tehnikanı çalğan ediler. O vaqıt Bekirova işbu vaqiada «siyasiy temelni» körmegeni aqqında bildirdi.
Noyabr 18-den 19 kününe keçer gecesi belgisiz şahıslar Aqmescitte yerleşken «Yıldız» qırımtatar mecmuasınıñ muarririyetine sürip kirmege tırıştı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
