Link açıqlığı

Uquq qoruyıcılar Herson vilâyetinde Qırım qamaçavı boyunca vatandaşlıq qamaçavı iştirakçilerine qol tuta, amma narazıcılarnı Ukraina qanuniyetini bozmamaq çağıralar.

Bu aqta Qırım.Aqiqat Radiosınıñ efirinde Ukraina Milliy politsiyasınıñ narko cinayetke qarşılıq boyunca departamentiniñ başı, Herson militsiyasınıñ sabıq reberi İlya Kiva bildirdi.

«İşbu vaziyetke qanuniy munasebet aqqında aytsaq, bu tiremelerni kim, ne vaqıt ve ne maqsat ile bozğanı ile bağlı malümat çoqtan toplanğan. Ne olsa da, tiremelerni bozmağa qanuniyet boyunca… E, ebet, mantıq bar, bu «energetik qamaçavnı» işğal etilgen territoriyağa çoqtan etmege kerek edi, ve bu, eñ azından, bir yılğa keçikken qarar. Amma qanuniyetke köre, tam bozuluv – elektrik tiremeleriniñ patlavı», – dedi o.

Programmanıñ diger musafiri – Qırım qamaçavı boyunca aktsiya idarecisi Lenur İslâmov dey ki, «Ukraina akimiyeti Qırımnı qaytarmağa istemey».

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley. Noyabr 23 künü yarımadada raatlıq künü olaraq ilân etilgen.

Ukrain uquq qoruyıcıları elektrik tiremeleriniñ bozuluvı boyunca cinaiy işlerni açtı. Qırımda yarımadanıñ rusiyeli prokuraturası yarımadağa elektrik energiyasınıñ berilmemesini taqiq ete.

XS
SM
MD
LG