Link açıqlığı

Qırımnıñ rusiyeli başı yarımadanıñ elektrik energiyası ile teminlevinde vaziyetniñ daa da beterleşecegini tahmin ete.

Bu aqta Qırımnıñ rusiyeli ükümetiniñ matbuat hızmeti tarafından aşkâr etilgen Aksenovnıñ beyanatında aytıla.

«Ukrainada soñ bir qaç ay devamında şekillengen siyasiy vaziyetke baqsaq, şimdi qamaçavda iştirak etken ve Qırımda qıyın vaziyetni ortağa çıqarmağa tırışqan qırımlılar sayesinde beterine azırlanmağa kerek olğanını tüşünemiz: fevqulâde vaziyet müddeti Keriç boğazından energokopürniñ birinci nevbeti işlettirilmegence, yani dekabr 22-ne qadar. Amma 100% degil», – denile beyanatta.

Aksenovnıñ sözlerine köre, bu müddet «uzattırıla bile». Bunıñ ile o şunı da qayd etti ki, bağ «yarıq bile olmağan yerde» olmalı. Aksenovnıñ işandırğanına binayen, dizel-gineratorlar er bir meskün yerniñ qullesine tiklenmeli, «böylece bağ ve internet olacaqtır».

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley. Noyabr 23 künü yarımadada raatlıq künü olaraq ilân etilgen.

Ukrain uquq qoruyıcıları elektrik tiremeleriniñ bozuluvı boyunca cinaiy işlerni açtı. Qırımda yarımadanıñ rusiyeli prokuraturası yarımadağa elektrik energiyasınıñ berilmemesini taqiq ete.

XS
SM
MD
LG