Link açıqlığı

Saatnıñ esas haberi

Kоstinskiy Qırım ile memuriy sıñırdaki ziddiyet aqqında: jurnalistlerni tiymege kimseniñ aqqı yoq


Telekorüv ve radioyayınlav boyunca milliy şurasınıñ azası Sergey Kоstinskiy uquq qoruyıcı organlarnı Qırım ile memuriy sıñırda jurnalistlerge ücüm ile bağlı vaqialarnı taqiq etmege çağırdı. Bu aqta o Facebook saifesinde bildirdi.

Kоstinskiy Qırım «vatandaşlıq qamaçavı» iştirakçileri tarafından ücüm etilgenine şikâyet etken «Hersonskiye vesti» jurnalistleriniñ bildirüvini izaatladı.

Bildirgeni kibi, bu vaqia boyunca delillerni toplay.

«Menimce, bu sebepten cinaiy iş açılmalı. Ne uquq qoruyıcı, ne faaller jurnalistlerni tiyip olamay. Uquqiy devlette yaşaymız! Jurnalist – toqunmaz şahıstır», – qayd etti Kоstinskiy.

Yaqında Ukraina haber siyaseti naziri Yuriy Stets aytqanı kibi, ATR qırımtatar telekanalınınıñ jurnalisti Gülsum Halilovağa zarar ketirilgeni sebebeinden İçki işler nazirligine muracaat etip, cinaiy işniñ açılmasını talap etecektir.

Herson vilâyeti Ukraina İçki işler nazirliginiñ idaresinde deyler ki, ATR jurnalistiniñ arizası boyunca Ukraina cinaiy kodeksiniñ 171 maddesi boyunca cinaiy ketişat açılğan.

«Hersonskiye vesti» saytı jurnalistleriniñ faaliyetine keder etken narazıcılarğa nisbeten de cinaiy işniñ açılması aqqında mesele baqıla.

Noyabr 20 künü Herson vilâyetinde patlav sebebinden elektrik bercileriniñ eki demir-beton tiremesi devirildi ve Qırımğa elektrik teminlevi keçken daa eki yolaqnıñ tiremeleri bozuldı.

Noyabr 21 künü Herson vilâyeti Çaplinka rayonında devirilgen tiremelerniñ yanında tamirine keder etken faaller ve uquq qoruyıcılar arasında ziddiyet yüz berdi, qavğa qoptı.

Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley.

«Krımenergo» malümatına köre, Ukraina ağından elektrik energiyası ile teminlev 1 210 megavatt miqarında etile edi. Qırımnıñ orta qullanuvı – 1100 megavattnı teşkil ete edi. Şimdi «Ukrenergo» milliy energetik şirketinden 0 megavatt kele (er dört yolaq söndürilgen).

XS
SM
MD
LG