Faaller Herson vilâyetinde Qırımnı elektrik energiyası ile teminlegen yolaqlarınıñ tiremelerini blok etmekte. Bu aqta Radio Svoboda mühbiri bildire.
Geniçesk ve Çaplinka rayonlarında faaller alâ daa tiremelerni qorumaqta, gece devamında vaziyet sakin edi, narazıcılarnı quvmağa ıntılmadılar.
Tamir brigadalarınıñ tehnikasını «Çonğar» kiriş noqtasından keçirdiler, amma tamir işlerine başlamağa narazıcılar izin bermediler.
Radіo Svoboda mühbiri bildirgeni kibi, yaqında yapılğan tamir işleri yalıñız ağlarnı topraqladı.
Herson vilâyet devlet memuriyetinde bildirilgeni kibi, bozulğan tiremelerniñ tamiri ile bağlı vaziyetni al etmek içün faaller ile muzakereler keçirilecek. Añlaşıp olsalar, «Ukrenergo» hadimleri er şeyni dört künde al ete bile.
Noyabr 20 künü Herson vilâyetinde patlav sebebinden elektrik bercileriniñ eki demir-beton tiremesi devirildi ve Qırımğa elektrik teminlevi keçken daa eki yolaqnıñ tiremeleri bozuldı.
Noyabr 21 künü Herson vilâyeti Çaplinka rayonında devirilgen tiremelerniñ yanında tamirine keder etken faaller ve uquq qoruyıcılar arasında ziddiyet yüz berdi, qavğa qoptı.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley.
«Krımenergo» malümatına köre, Ukraina ağından elektrik energiyası ile teminlev 1 210 megavatt miqarında etile edi. Qırımnıñ orta qullanuvı – 1100 megavattnı teşkil ete edi. Şimdi «Ukrenergo» milliy energetik şirketinden 0 megavatt kele (er dört yolaq söndürilgen).
