Aqyarda bazar künü, noyabr 22-de, ötmek almağa istegen insanlardan nevbetler tizildi, haber ete Qırım.Aqiqat mühbiri.
Aqyarlılar nevbette turıp, elektroteminlev ile bağlı problemlerden sebep şeerde ötmek satuvı qıyınlaşacağından saqınğanlarını bildireler. Bunıñ ile aytqanları kibi, şeer ötmek zavodında («Tsar-Hleb» şirketi) donatuvnıñ bir qısmı elektrikten çalışa.
Yerli sakinlerniñ malümatına köre, noyabr 22-ne keçer gecesi elektroteminlev ile bağlı problemlerden sebep bir sıra qıyınlıq peyda oldı: daire ve aşayt tükânlarında buzdolaplar iriy, rayon ve mesken evlerde suv yoq ola. Şeerde mobil ağı bazı yerlerde çalışmay.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley.
«Krımenergo» malümatına köre, Ukraina ağından elektrik energiyası ile teminlev 1 210 megavatt miqarında etile edi. Qırımnıñ orta qullanuvı – 1100 megavattnı teşkil ete edi. Şimdi «Ukrenergo» milliy energetik şirketinden 0 megavatt kele (er dört yolaq söndürilgen).
