Link açıqlığı

Qırımtatar rejissörı ve aktörı Ahtem Seytablayev dey ki, Rusiye tarafından işğal etilgen Qırımnı Ukraina nezaretine qaytarmağa qolay degil. Fikrine köre, Rusiye halqını Qırım – Rusiye olğanına işandırmaq içün ğayet çoq areket etildi.

Bunı o noyabr 20 künü «5 kanal» efirinde bildirdi.

«Rusiye Federatsiyasınıñ halqını Qırım – Rusiye olğanına işandırmaq içün o qadar areket etildi ki, em Qırımda da «rus dünyası» añlamını tasdiqlağan bir çoq şey bar, şunıñ içün qolay qaytarıp (Qırımnı – QA) olamamız, ğaliba», – dey o.

«Qırımnı biz qaytarmaq kerekmiz, bizge onı tepside kimse ketirip: «alıñız» demez, balalarımıznıñ kelecegi içün bizim yerimizde kimse memleketimizni qurmaz. Bizden ğayrı bunı kimse etmez», – dep qoştı aktör.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG