Link açıqlığı

«Ukrenergo» şirketi Herson vilâyetinde Rusiye tarafından işğal etilgen Qırımğa elektrik ceryanı keçken tiremelerniñ bozuluvı ciddiy olğanı aqqında bildire. «Ukrenergo»da yarımadanıñ elektrik ağından tam söndürilmesini tahmin eteler.

Bu aqta ukrain şirketiniñ matbuat hızmeti bildire.

Beyanatqa köre, mütehassıslar «Melitopol – Canköy» ve «Kahovka – Titan» yolaqları tiremeleriniñ tüşmesini qayd etti. Bunıñ ile «Kahovka – Titan» yolağı ile bir ayatta olğan elektrik bericileriniñ yolaqlarında da bozuluvlar bar, şu sırada: «Kahovskaya – Ostrovskaya», yolağındaki demir-beton tiremesinde çatlaq ve «Kahovskaya – Canköy» yolağındaki demir tiremesiniñ bozuluvı.

«Bozuluvlar atış ve patlav aletleriniñ qullanılması neticesinde yüz berdi», – deyler şirkette.

«Eki yolaqta da ciddiy bozuluv, neticeleri tam söndürüv ola bile (misal içün, ava şaraitleriniñ bozuluvı vaqtında, ruzgâr qopqanda). Qırımnıñ bütünley söndürilmesi ve Herson ve Nikolayev vilâyetleriniñ energoteminlevine zarar ketirilmesi mümkün», – dep qoştılar «Ukrenergo»da.

Şirkette qayd etilgeni kibi, Qırımğa energiyanı bergen bu üç yolaqnıñ söndürilmesi şaraitlerinde «stantsiyalarnıñ sheması ğayet işansız olacaqtır».

«Daa bir elementiniñ bozuluvı onıñ tam söndürilmesine ketirir, ve, elbette ki, Herson ve Nikolayev vilâyetleri qullanıcılarınıñ 40% elektrik ceryanından marum qala bilir», – deyler şirkette.

Al azırda Cenübiy ve Dnepr energiya sistemalarınñ mütehassısları işlerniñ miqyasını belgiley. İnfrastukturanıñ bozulğan obyektlerine zaruriy malzeme ve donatuvnı ketirmekteler, deyler «Ukrenergo»da.

Qırımnıñ rusiyeli ükümetiniñ yaqarlıq ve energetika naziri Sergey Yegorov aytqanı kibi, Herson vilâyetinde eki elektrik ağınıñ tiremeleri bozulğanıQırımnıñ teminlevine tesir etmedi.

Herson vilâyetinde oktâbr 20 künü kene bir kene «Melitopol-Canköy» yolağınıñ tiremelerini bozdılar. Biriniñ tübüne mina qoyulğan edi. Militsiyanıñ bildirgenine köre, 3 mina ve 2 trotil qılıçı tapıldı. «Elektroenergetika obyektlerniñ aselet bozulması» maddesi boyunca cinaiy ketişat başlanıldı.

Oktâbr 6-na keçer gecesi belgisiz şahıslar Canköy-Melitopol yolağınıñ eletktrotiremesini bozdılar.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, bundan soñ yarımadanıñ «energetik qamaçavı» da başlana bile.

XS
SM
MD
LG