Ukraina Yuqarı Radasınıñ «Oppozitsionnıy Blok» firqasından deputatı Vadim Rabinoviç dey ki, ukrain siyasetçileri şimdi Rusiye nezareti altında olğan Qırımnıñ qaytarıluvı meselesini sıq kötere, amma memlekette yaşayış tarzını eyileştirmek içün bir şey yapmay. Ukrainanıñ muvafaqiyetli inkişafı şaraitlerinde, Qırım onıñ idaresi altına qaytır, dey o.
Bu aqta Rabinoviç noyabr 20 künü Qırım.Aqiqat Radiosınıñ efirinde bildirdi.
«Ukraina ilerilegen iqtisadiy memleket, yanında ise Rusiyeniñ muvafaqiyetsiz iqtisadı nümünesi olğanda, Qırımnıñ Ukrainağa qaytması mümkün olur. O vaqıt ola bilir», – dey o.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
