Qırım qamaçavı boyunca vatandaşlıq qamaçavınıñ iştirakçileri Herson vilâyetinde kene bozulğan elektrik tiremeleriniñ tamirini blok etecek olalar.
Bu aqta Qırım.Aqiqatqa Qırım qamaçavı boyunca aktsiya idarecisi Lenur İslâmov bildirdi.
«Mında qırımtatar faalleri, «Avtomaydan», «Aydar» batalyonı ve «Pravıy sektor» iştirak etecek… Qırım «vatandaşlıq qamaçavı» ştabı şimdi mında buluna ve biz er dört yolaqta tamirni blok etecekmiz», – dedi o.
Onıñ sözlerine köre, şimdi elektrik tiremeleriniñ dört yolağı bozulğan, olardan «ekisi yata».
İslâmov dey ki, tiremelerniñ bozuluvı içün kim mesuliyetli – belgisizdir, amma hatırlatqanı kibi, yaqında yarımada qamaçavınıñ iştirakçileri «nezaretini toqtatqanaları» aqqında bildirgen edi.
«Bunı er kes yapa bile edi. Qırımdan kelgen diversantlarnıñ olması mümkün, mında olğan diversantlar, ya da Ukraina vatanperverleri yapqandır. Er kes yapa bile edi, amma bizim alâqamız yoq. Bizim patlavlarda degil de, qamaçav ketişatında merağımız bar», – dey İslâmov.
O şunı da qoştı ki, şimdi faaller «nezaretini qaytardı ve mudafaanı başladı». Bunıñ ile Qırım qamaçavı boyunca aktsiya idarecisi qayd etkeni kibi, «ukrain devleti öz başına Qırımğa elektrik energiyasınıñ berilmesini sıñırlamaq kerektir».
Noyabr 20 künü Herson vilâyetiniñ uquq qoruyıcıları eki köyde elektrik tiremeleriniñ bouzuluvı aqqında bildirgen ediler.
Herson vilâyetinde oktâbr 20 künü kene bir kene «Melitopol-Canköy» yolağınıñ tiremelerini bozdılar. Biriniñ tübüne mina qoyulğan edi. Militsiyanıñ bildirgenine köre, 3 mina ve 2 trotil qılıçı tapıldı. «Elektroenergetika obyektlerniñ aselet bozulması» maddesi boyunca cinaiy ketişat başlanıldı.
Oktâbr 6-na keçer gecesi belgisiz şahıslar Canköy-Melitopol yolağınıñ eletktrotiremesini bozdılar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, bundan soñ yarımadanıñ «energetik qamaçavı» da başlana bile.
