Link açıqlığı

Qırım Musulmanları Diniy İdaresinde bildirilgeni kibi, Aqmescitte noyabr 20-ne keçer gecesi belgisiz şahıslar Cuma Cami qurucılığı yerindeki isarda asılğan levhalarnı yırtıp qoydılar.

«Qırım ve Aqyar Musulmanları Diniy İdaresi bu vaqianı tarik olaraq tanıy ve dindaşlarnı tınç olıp, bu kibi cinayetlerge qulaq asmamaq çağıra», – denile beyanatta.

QMDİde haber etilgeni kibi, bu endi ekinci sefer yüz bergen vaqiadır, birinci kere bu sene sentâbrniñ soñunda olğan edi.

«Bu kibi tariklerge endi ekinci kere rastkelemiz ve bizim içün esası – olarğa qulaq asmamaq ve ne olsa da, cevap qaytarmamaq. Menimce, Allahqa inanıp, tınçlığımıznı saqlasaq, birlik ve beraberlikte areket etsek, mıtlaq camini de qurarmız ve milliy ve diniy degerliklerimizniñ ğayrıdan doğuvı yolunda adımlarmız», – dep izaatlı Qırım Müftisiniñ muavini Ayder İsmailov.

Qırım Müftiyliginiñ matbuat hızmeti bildirgeni kibi, vaqia yerine uquq qoruyıcı organlarınıñ hadimleri kelip, zaruriy taqiqat areketlerini keçirdi.

Qırım Müftiyligi yarımada uquq qoruyıcı organlarına muracaat etip, «müminlerniñ aqlarını bozğan bu kibi cinayetlerniñ açılması içün bütün zaruriy areketlerni etmege» çağırdı.

Qırımnıñ uquq qoruyıcı organları tarafından bu aqta resmiy izaat daa yoqtır.

XS
SM
MD
LG